Շոկոլադ ընտրելիս ավելի լավ է նախապատվությունը տալ սեւին։ Եթե մարդն օրական երեք անգամ ուտի 10% կակաոյի պարունակությամբ 85 գ կտոր մուգ շոկոլադ, նա իրեն ավելի երջանիկ կզգա։
Այս եզրակացությանն են հանգել Հարավային Կորեայի Սեուլի ազգային համալսարանի գիտնականները, գրում է Daily Mail-ը։
Հետազոտությանը մասնակցել է 46 մարդ։ Նրանք բաժանվել են երկու խմբի. Մի խումբը երեք շաբաթ շարունակ կակաոյի տարբեր տոկոսներով շոկոլադ է օգտագործել, իսկ մյուսն ընդհանրապես շոկոլադ չի կերել։
Հետազոտության արդյունքների հիման վրա գիտնականները եկել են այն եզրակացության, որ այն մարդկանց մոտ, ովքեր մուգ շոկոլադ են օգտագործում, տրամադրությունը բարելավվել է։ Գիտնականները տրամադրության դրական փոփոխությունները կապում են աղիների միկրոբիոտայի փոփոխության հետ՝ կապված մուգ շոկոլադի օգտագործման հետ:
«Հայտնի է, որ մուգ շոկոլադը կարող է փոխել տրամադրությունը, սակայն մենք առաջին անգամ ապացուցեցինք, որ մուգ շոկոլադի ամենօրյա օգտագործումը ազդում է մարդու ֆիզիոլոգիական և հոգեբանական վիճակի վրա»,- ընդգծել են հետազոտության հեղինակները։
Ավելի վաղ բժիշկները բացատրել էին, թե ինչու է շոկոլադն օգտակար առողջության համար։ Ըստ մասնագետների՝ այն առաջին հերթին պարունակում է տրամադրության համար պատասխանատու հորմոններ՝ սերոտոնին, էնդորֆին և դոֆամին (այսպես կոչված՝ «երջանկության հորմոն»):